ex litteris diurnis

<written in May 2010 about a forum altercation; deleted by mods and reposted there by me>

censuit, heus!, aliquis delenda sibi mea metra.
carmina sunt igitur restituenda mihi:

de castigatione iniusta
accipit ex merito stulta is qui stulta poposcit;
nil igitur de quo iure queraris habes.

quae acciderint
"heu! cur stulta tot a viris rogantur
nec licet petulantias referre
iustas?" dixit et haec Akela fata
est "castum esse decet Chamaeleon<t>em"
inquit "abstineatque sese acerbis
verbis neve agat ut Catullus olim!"

de invidia stultorum ad Chamaeleon<t>em:
simplicibus verbis ignaros saepe docebas
atque docens nobis haud ioca pauca dabas!
ridendum quis enim ioculum pro serio haberet,
qui istis praeceptis salsus inesse solet?
at simulac nugas una est conquesta iocosas,
adlatam subito vim sibi quisque putat.
iamque fremunt omnes, una gannitur in unum.
uno namque sono stulta blatire iuvat.

de ingratis animis stultorum
sic quoque Miltiaden etiamque Themistoclea olim
expulit e patrio volgus inane sinu.
nam si profueris tibi merces nulla manebit.
iram pro meritis invidiamque subis.
inde cave credas quemquam tibi gratiam habere!
est hominum ingratos esse fuisse fore.

qua lingua hoc in foro loquendum sit
quid, mihi dede, velint sibi talia barbara verba?
hoc lingua Latia, stulta, loquare foro!

<Poems about the world football championship 2010; again with a small correction>

omnibus ex terris nunc Austrina Africa aditur,
hospes quae primum totius orbis erit.
quaeritur hic pubes, studioso quae pede possit
optima in adversum pellere rete pilam.
gloria felici victori lausque manebit -
fautorem interea zytha bibenda iuvant.

Prima dies caruit victore; sed omnia vincit
fautor, inauditis qui tonat ante sonis

Perdita ab invicta est Australia pube Leonis!
Vicit Fortuna nostra favente manus!

sunt pede qui facili vinci dicantur; at arte
illos ne esse putes inferiore cave!
namque suapte ruunt expertes mole superbi
consilii*; et victi mox sua fata gement.
sic periunt fortes, sic lapsa est Gallica turma;
Hispani ac nostri sic cecidere viri.
----------
* vis consili expers mole ruit sua (Horatius)

exsultat mundus - superatis nam via Gallis
caespite ter trito iam facienda domum est!

ulciscenda hodie praefecti iniuria laesi est;
prisco more debet sanguine sanguis emi!
oppugnate Afros et eorum frangite crura,
ne quis ab horrifico caespite sanus eat!

calcis agona cano quem offert nunc Africa mundo;
certamen causam, metra Camena dedit.
nos pedis atque pilae fautores esse fatemur -
unum donum etiam plus Cereale placet!

nil contingebat, iamque una aufugerat hora -
Germanique nigrum tunc petiere latus:
Müller adest, follemque refert, Özil iacit - ecce
reticula, ei!, subito sauciat ille pilā!!
maxima gaudia erant, evicit turma Leonis
"laeti nunc" fautor "zytha petamus" ait.
"cur bibitis?" quaeris - victoria causa bibendi est!
pro qua nunc avido est ore colenda Ceres.

Italici redeunt victi Gallosque sequuntur;
victores veteres iam periere duo.

gregibus exiimus <exiimus gregibus>, nunc pars extrema propinquat
inque dies quaedam linquet agona manus.

fraude Britanni olim nobis rapuere coronam,
falso cum portae est dictus inesse globus.
iure negata ergo nunc linea transita folle est!
arbitrium caecum Iustitia ipsa dedit.
cur igitur quereris de fraude, Britanne? putasti
vestros num nostram vincere posse manum?

crescit certamen, cum cogit cedere victas
turmas; nunc remanent binae in agone quater.
crescit et hoc carmen: versus certamine aluntur,
tamquam alitur zythis auctor agona videns.

Ecce Diego gemens flevit certamine pulsus,
frustra ad caelestis miserat ille preces.
si quae turma pilis omnino ludere nescit,
nil sane miserae proderit ipse Deus!

nos miseros! dirum lolligo nuntiat omen!
spesne his auditis ulla salutis erit?

nos rupere malae lolliginis omina dira -
spes quibus auditis nulla salutis erat!
quid faceremus enim? fata oppugnavimus ipsa,
quae maiora quidem veste Leonis* erant!
_____
* Jogi Löw se quoque die eadem veste induit sperans sic Fortunam sibi fauturam

sepia providit, nostrum quod quisque timebat:
diro prodigio est lapsa Batava manus.
vicere Hispani: pedibus felix Iniesta
folle omnes populos hos superare probat.
ecce triumphantes nunc tollunt poculum in altum -
quantus vos tractat, lutea turma, dolor!

certāmen placuit: follis spectācula magna
spectābant oculī, zythaque multa iecur!
Hispāni prīmī factī sunt ante Batāvos;
tertia dein sequitur turma Leonis eos.
fīnem obvēnit agōn capiunt et carmina fīnem.
Āfrica tē placidē, Marce, valēre iubet.

mox (duo post annōs) Pōlōnia dēnuō agōna
praebēbit nōbīs ac nova metra paret.
tunc cadere Hispānōs nōstrōsque vidēbimus inde
pōcula victōrēs māxima ferre domum!

<Written in July 2018 about Flappy the bird>

aliquot ante dies Flappius passer (quem paulo ante cognoveram et inter amicos meos numeraveram) me ad summum luctum maeroremque commovit. Qui, cum conclave magistrorum per fenestram apertam intrasset, per clausam exire frustra conatus et gravissimo casu ad solum delapsus vitam ante oculos omnium magistrorum profudit. tumulus ante scholam paratus est quo ossa volucris molliter requiescant.
propterea ante domum decoravi carmine saxum
quo casus miserae commemoretur avis:



ne mihi credideris! fabulam pars ficta fefellit:
luctūs qui referat, non premit arva lapis.
Flappius incolumis rursus surrexit ad auras
atque Altenburgi nunc quoque in urbe volat